👉ផ្លូវមានអង្គ​ ៨ ប្រសើរជាងផ្លូវទាំងឡាយ បទ​ ៤​ គឺអរិយសច្ចប្រសើរជាងសច្ចៈទាំងឡាយ វិរាគធម៌​ប្រសើរ​ជាង​ធម៌​ទាំង​ឡាយ​ ម្យ៉ាងទៀត ព្រះតថាគតមានចក្ខុ ប្រសើរជាងសត្វទ្វេបាទទាំងឡាយ ។

👉ផ្លូវនេះឯង ប្រព្រឹត្តទៅដើម្បីសេចក្ដីបរិសុទ្ធនៃទស្សនៈ​ ផ្លូវដទៃមិនមានទេ ព្រោះហេតុនោះ អ្នកទាំងឡាយ ចូរ​ដើរ​ទៅ​កាន់ផ្លូវនោះ​ ផ្លូវនេះ​ ជាផ្លូវញ៉ាំងមារឲ្យវង្វេង ។

👉អ្នកទាំងឡាយ​ ដើរទៅកាន់ផ្លូវនេះហើយ អាចនឹងធ្វើឲ្យផុតទុក្ខបាន​ ផ្លូវនេះហើយ ដែល​តថាគត​ថា​ ជា​ផ្លូវ​កម្ចាត់​បង់​កូនសរ ប្រាប់អ្នកទាំងឡាយ ។

👉សេចក្ដីព្យាយាមញ៉ាំងកិលេសឲ្យក្ដៅសព្វ អ្នកទាំងឡាយ​គប្បីធ្វើ​ ព្រះតថាគតទាំងឡាយ​ គ្រាន់តែជាអ្នកប្រាប់ ជន​​ទាំង​ឡាយ​ មានការពិនិត្យ​ បើបានដើរទៅហើយ នឹងរួចចាក​ចំណង​របស់មារបាន ។

👉កាលណា​ បុគ្គលយល់ឃើញដោយប្រាជ្ញាថា សង្ខារទាំងពួងមិនទៀងដូច្នេះ កាលណោះ រមែងនឿយណាយ ក្នុង​សេចក្ដីទុក្ខនេះ​ ជាផ្លូវនៃសេចក្ដីបរិសុទ្ធ ។

👉កាលណា បុគ្គលយល់ឃើញដោយប្រាជ្ញាថា​ សង្ខារទាំងពួងនាំមកនូវសេចក្ដីទុក្ខដូច្នេះ កាលណោះ រមែង​នឿយ​ណាយ​ក្នុងសេចក្ដីទុក្ខ នេះជាផ្លូវនៃសេចក្ដីបរិសុទ្ធ ។

👉កាលណា បុគ្គលយល់ឃើញដោយប្រាជ្ញាថា​ សង្ខារទាំងពួងមិនមែនជារបស់ខ្លួនដូច្នេះ កាលណោះ រមែង​នឿយ​ណាយ​ក្នុងសេចក្ដីទុក្ខ នេះជាផ្លូវនៃសេចក្ដីបរិសុទ្ធ ។

👉បុគ្គលនៅកំលោះ​ មានកម្លាំង​ ទាស់តែប្រកបដោយសេចក្ដីខ្ជិលច្រអូស មិនប្រឹងប្រែងក្នុង​កាលដែលគួរប្រឹងប្រែង មាន​សេចក្ដីត្រិះរិះក្នុងចិត្ត លិចចុះក្នុងអកុសលវិតក្ក ជា​មនុស្ស​ខ្ជិល​ បុគ្គល​ខ្ជិល​នោះ​​ រមែង​មិន​បាន​ផ្លូវ​បញ្ញា​
ឡើយ ។

👉បុគ្គលគប្បីជាអ្នករក្សាវាចា សង្រួមឲ្យល្អ ដោយចិត្ត​ ទាំងមិនគប្បីធ្វើអកុសលដោយកាយ បុគ្គល​គប្បី​ជម្រះ​កម្មបទ​ទាំង​ ៣ នេះ​ និងគប្បីត្រេកអរចំពោះមគ្គ ដែលលោកអ្នកស្វែងរកគុណដ៏ល្អ​ សំដែងទុកហើយ ។

👉ប្រាជ្ញា​ រមែងកើតអំពីការប្រកប សេចក្ដីវិនាសប្រាជ្ញា​ រមែងកើតអំពីការមិនប្រកប អ្នកមានប្រាជ្ញា​ ដឹងការប្រកប និង​ការមិនប្រកបទាំងពីរនេះថា ជាគន្លងនៃសេចក្ដីចម្រើន និង​សេចក្ដី​វិនាស​ហើយ​ ប្រាជ្ញា​ចម្រើន​ឡើង ដោយ​ប្រការណា គួរតម្កល់ខ្លួនទុក ដោយប្រការនោះ ។

👉អ្នកទាំងឡាយ​ ចូរកាត់កិលេសដូចជាព្រៃចេញ ចូរកម្ចាត់ដើមឈើ​ ព្រោះភ័យកើតអំពីកិលេស ដូចជាព្រៃ ម្នាល​ភិក្ខុ​ទាំងឡាយ អ្នកទាំងឡាយ​ ចូរកាត់កិលេសដូចជាព្រៃឈើផង កិលេសដូចជាដើមឈើដុះក្នុងព្រៃផង ។

👉ចូរជាអ្នកកុំមានកិលេស ដូច​ជា​ព្រៃ​ឡើយ​ ព្រោះ​ថា​ កិលេស​ដូច​ជា​ព្រៃ​ឈើ​​ ដុះ​ក្នុង​ព្រៃ​របស់​នរជន​ សូម្បី​មាន​ប្រមាណ​តិចក៏ដោយ បើកាត់មិនដាច់ក្នុងពួកនារី​ ដរាបណា​ នរជននោះឯង តែងមានចិត្តចំពោះក្នុងពួកនារី ដូចកូនគោនៅកំពុងបៅដោះ​ ដែលមានចិត្តជាប់នៅនឹងមេ ដរាបនោះ ។

👉អ្នកចូរដកសេចក្ដីស្រឡាញ់របស់ខ្លួនចេញ ដូចបុគ្គលដកផ្កាកុមុទ​ ដែលកើតក្នុងសរទកាលដោយដៃ អ្នក​ចូរ​បណ្ដុះ​នូវផ្លូវសន្ដិភាពតែម្យ៉ាង​ ព្រះនិព្វាន ព្រះសុគតសំដែងទុកហើយ ។

👉អញនឹងនៅក្នុងទីនេះអស់វស្សានរដូវ​ អញនឹងនៅក្នុងទីនេះ​ ក្នុងហេមន្ដរដូវ​ និងគិម្ហរដូវ ជនពាល រមែង​គិត​ខុស​ដូច្នេះ​ តែងមិនដឹងច្បាស់សេចក្ដីអន្ដរាយឡើយ ។

👉មច្ចុគឺសេចក្ដីស្លាប់ តែងនាំយកនរជន អ្នកស្រវឹងជ្រប់ក្នុងកូននិងសត្វចិញ្ចឹម មានចិត្តជាប់ជំពាក់ ក្នុង​អារម្មណ៍​ផ្សេងៗ​ នោះ​ ដូចជំនន់ទឹកធំ នាំយកអ្នកស្រុកកំពុងដេកលក់ ។

👉កាលបុគ្គលត្រូវមច្ចុសង្កត់ហើយ កូនទាំងឡាយ មិនមាន​ ដើម្បីជាទីពឹង​ បិតា​ ក៏មិនមាន ទាំងផៅពង្ស​ ក៏មិនមាន ដើម្បី​ជាទីពឹងឡើយ ។

👉សេចក្ដីទីពឹង​ ក្នុងញាតិទាំងឡាយ​ ក៏មិនមាន​ បណ្ឌិតដឹងអំណាចប្រយោជន៍នេះហើយ គួរ​ជា​អ្នក​សង្រួម​ក្នុង​សីល​ គួរ​ប្រញាប់ប្រញាល់ជម្រះផ្លូវ​ ជាទីកាន់ព្រះនិពា្វនឲ្យបាន ។