👉បុគ្គលគួរលះបង់សេចក្ដីក្រោធចេញ គួរលះបង់មានះចេញ គួរកន្លងសញ្ញោជនធម៌ទាំង​អស់​ចោល​ចេញ​ ទុក្ខ​ទាំង​ឡាយ​ តែងមិនជាប់តាមបុគ្គល ដែលមិនជំពាក់ក្នុងនាម​ និងរូប​ មិនមាន​កិលេសជាគ្រឿងកង្វល់នោះឡើយ ។

👉បុគ្គលណា ហាមឃាត់សេចក្ដីក្រោធ ដែលកើតឡើងហើយ​ ដូចសារថីទប់រថ​ ដែលកំពុងលឿនបាន តថាគត​ហៅ​បុគ្គលនោះថា​ សារថី​ ជនក្រៅពីនេះ គ្រាន់តែជាអ្នកកាន់ខ្សែបង្ហៀរ​ ( មិនមែនជា​សារថី​ឡើយ ) ។

👉បុគ្គលគប្បីឈ្នះមនុស្សក្រោធបាន ដោយការមិនក្រោធ​ គប្បីឈ្នះមនុស្សអសប្បុរសដោយអំពើ​ជា​សប្បុរស​ គប្បី​ឈ្នះមនុស្សកំណាញ់ដោយការឲ្យ គប្បីឈ្នះមនុស្សនិយាយមិនពិត​ ដោយ​ពាក្យពិត ។

👉បុគ្គលគួរពោលពាក្យពិត ១ មិនគួរក្រោធ ១ កាលគេសូមវត្ថុសូម្បីមានតិច ក៏គួរឲ្យតាមតិច ១ បុគ្គល​គប្បី​ទៅ​កើត​ក្នុងសំណាក់ទេវតាទាំងឡាយបាន​ ដោយហេតុទាំង ៣ នេះឯង ។

👉ជនទាំងឡាយណា​ ជាអ្នកប្រាជ្ញ មិនបៀតបៀនសត្វដទៃ​ សង្រួមហើយ​ ដោយកាយទ្វារជាដើម ជានិច្ច ជន​ទាំង​ឡាយ​នោះ​ រមែងទៅកាន់ស្ថានដ៏មិនប្រែប្រួល ជាស្ថានដែលគេទៅដល់ហើយ​ តែងមិនសោកស្ដាយ ។

👉អាសវៈទាំងឡាយ របស់បុគ្គលអ្នកភ្ញាក់រឭកសព្វកាល​ ជាអ្នកសិក្សាត្រៃសិក្ខា ទាំងថ្ងៃទាំង​យប់ មាន​ចិត្ត​ចុះ​ស៊ប់​កាន់​ព្រះនិពា្វន​ តែងដល់នូវការតាំងនៅមិនបានឡើយ ។

👉ម្នាលអតុលៈ​ ការតិះដៀល​ និងការសរសើរនេះ​ ជារបស់បុរាណ​ ការតិះដៀល​ និងការសរសើរ​នេះ​ មិន​មែន​ទើប​នឹង​កើតឡើងក្នុងថ្ងៃនេះទេ​ ( ព្រោះថា ) ជនទាំងឡាយ​ តែងនិន្ទាបុគ្គលអ្នកអង្គុយស្ងៀមក៏មាន និន្ទា​បុគ្គល​អ្នក​និយាយច្រើនក៏មាន​ និន្ទាបុគ្គលអ្នកនិយាយល្មមប្រមាណក៏មាន ( បុគ្គលណាៗ ក៏ដោយ ) ក្នុង​លោក​ដែល​មិន​ត្រូវ​គេ​និន្ទាគ្មានឡើយ ។

👉បុគ្គលដែលត្រូវគេនិន្ទាតែម្យ៉ាង​ ឬត្រូវគេ​សរសើរ​តែម្យ៉ាង​ មិន​មែន​មាន​មក​ហើយ​ តែក្នុង​អតីត​ទេ​ នឹង​មាន​ទៅ​ក្នុង​អនាគតក៏ទេ មានតែក្នុងបច្ចុប្បន្ននេះក៏ទេ ។

👉អ្នកប្រាជ្ញទាំងឡាយ​ សង្កេតមើលរាល់ៗ ថ្ងៃ ហើយសរសើរបុគ្គលណា​ ដែលជាអ្នកប្រព្រឹត្តមិន​ដាច់ មាន​ប្រាជ្ញា​ មាន​ចិត្តតម្កល់ខ្ជាប់ក្នុងបញ្ញា​ និងសីល ។

👉អ្នកណា គួរនឹងនិន្ទាបុគ្គលដែលដូចជាឆ្ដោរនៃមាសជម្ពោនទនោះបាន​ សូម្បីទេវតា​ និងមនុស្សទាំងឡាយ​ ក៏​សរសើរ​បុគ្គលនោះ​ ទាំងព្រហ្មក៏សរសើរដូចគ្នា ។

👉បុគ្គលគប្បីរក្សានូវការចម្រើនកាយ គប្បីសង្រួមកាយ គប្បីលះបង់កាយទុច្ចរិត គប្បីប្រព្រឹត្ត​កាយសុចរិត ។

👉បុគ្គលគប្បីរក្សានូវការចម្រើនវាចា គប្បីសង្រួមវាចា គប្បីលះបង់វចីទុច្ចរិត គប្បីប្រព្រឹត្ត​វចីសុចរិត ។

👉បុគ្គលគប្បីរក្សានូវការចម្រើនចិត្ដ​ គប្បីសង្រួមចិត្ដ គប្បីលះបង់មនោទុច្ចរិត គប្បីប្រព្រឹត្តមនោសុចរិត ។

👉អ្នកប្រាជ្ញទាំងឡាយ បានសង្រួមកាយ សង្រួមវាចា អ្នកប្រាជ្ញទាំងឡាយ បានសង្រួមចិត្ត​ហើយ​ លោក​ទាំង​នោះ​ឯង ឈ្មោះថា សង្រួមហើយដោយប្រពៃ ។